و قررنا أمس نطلع الجبل الأخضر..
أختي الجميلة ساكنة في مسقط بس عندهم بيت في الجبل..
في الصيف يطلعوا يصيفوا هناك.. يعني بالأصح يهربوا
من لواهيب الحرارة الشديدة الي تحت..
في طريق صعودنا.!
شرطة تتبعها سيارة الدفاع المدني.!
ايش المشكلة؟! ما أعرف..!
أول ما وصلنا هالاتي حبيبتي.. تستقبلنا.! و ما أعرف وش
ملبسنها عباية من صباح الله خير.!
حمادة كان يركض يستقلبنا.. و هذي أول إلتقاطة لأصدقائي القلبونين..
و هني مبوز لأنه شموس عيارة، بمجرد ما وصلت شافت في يده الريموت
و بدت تغايضه تاخذه عليه.! ما على شوفتها صغيرة.. هههههههع عليها حركات
زي السكر.!
أوكي.. أنا سلمت و على طول طلعت برع مع الصغار..
عشان نبدي جولتنا حول الأشجار و الفواكة.!
هني حضرة الشموسي، كذي بس عناد واقفة عند باب السيارة و ما راضية
تتحرك.. و تدف حمادة، رووح أنا قدام.!
و أنا طبعاً استمتتتتتتتع أشوفهم يتغايضوا و أبداً ما أحاول أفكهم..
بالعكس أصورهم بعد ^_*
هنا بدينا الجولة.. ما شاء الله تبارك الرحمن.. الفواكه في الجبل من الشجرة لـ/ فمك.! و مش
ح ـتبطل من لذتها.!
رمان في الصورة اليمين.. و بصل في الصورة الشمال.!
عنب.. منظره الجميل.. خلاني آتسائل.. يا ترى كيف فواكه الجنة.!
و هنا المشمش الجبلي..
طبعاً أنا ماشية برفقة فريق مكون 7 أطفال.. فيعني تعبت و أنا أقول لا تقطفوا..
و لا تاكلوا ما مغسل.. و لا تدوسوا.!
شجرة الخوخ ما شاء الله ثقيلة بالثمرة..
و هنا البرقوق.. يعني على الأقل تخيلت نفسي في بلاد الشام..
اهئ اهئ.. خيال على الأقل يعني إذا زيارة واقع.!
و هذي شجارة الصبار الي ما أحبها من أشواكها.. الي تثمر فاكهة
التين الشوكي.! بس هذي نظيفة ما فيها شوك.. لأنهم مصفينها عشان يسهل عليهم جني الثمرة.
و هذي ايييش تتوقعوا؟!
الله يسلمكم هذي شجرة الجوز..
أنا صراحة استغربت.. أول مرة أشوف شجرة الجوز..
جانب من الفريق المرافق لسيادتي ^_^
/
هنا قررنا نطلع و ناخذ الشعب الصغير للمنتزه..
شموستي تتزحلط..
و هذيلا المشاكسين الاثنين..
هاربين بعيد لأنهم مشتريين ديو من المقهى الي جنب المنتزه..
و ما شربوا العصير الي خذاه لهم اياه باباتي الي هو جدهم..
لكن طبعاً عدسة الزوم التقطت فعلتهم الظريفة.!
حمادي و هو غير منتبه.!
و هني هذيلا القلبونين.. وافقين ينادوني عشان أروح آشلهم..
لأني رايحه كنت عند الي مبتعدين يشربوا ديو.!
هذا هيكل لطائرة تم اسقاطها على يد المقاتل سليمان السيفي العماني أثناء حرب الجبل مع
سعيد بن تيمور و القوات البريطانية..
الي كان في ضيافتنا من شهر تقريباً.. نظراً لهجرته إلى زنجبار أثناء
حكم سعيد بن تيمور.. بسبب الظلم الذي عاشته عمان آنذاك.!
حركة خرطوبية.. اهئ اهئ أحاول أجرب أصور يدي و كأني ماسكه
الشمس نفس المصورين المبدعين.!
لكن ياخي أنا قصيرة و الشمس مرتفعة كثير كانت.. احم و فشلت اللقطة.!
و هذي بيوت في قرية قديمة أثرية..
و هذا الوادي دليل على انه شمس الجبل باردة.. و الجو لطيف جداً يميل للبرودة..
عاد له شهر تقريباً و ما جف.! لدرجة إنه متكون عليه طحالب و صاير أخضر.. و لو إنه تحت في نزوى.. كان يومين بالكثر حده..
و بعدها عليه السلام.!
منظر من الأعلى.. و لأني أنا حضرتي أكبر خوافه من المرتفعات.. مستحيييييل
و لا رضيييت أقترب.. حاسه حتى و أنا أصور خايفة إني تكفرني حصاه و أطيح.!
يا ويلي من خيالي ذك اللحظة.!
و هنا ماري القلب.. بالزي العماني العريق..
هالاتي قررت تشيل عني حقيبة الكام.!
و هنا يدي الكريمة تضيفكم بثمرة البوت..
هذي الشجرة الوحيدة الي صمدت أثناء مجاعة الجبل من دهوووور..
و الي عاش عليها أهل الجبل هم و أغناهم.. لين ما الله كشف الغمة.!
/
و سلامتكم..
و هذي التدوينة تقرير طويل مختصر..
عشان لا اشتقت بعد سنوات لمدونتي..
بتصادفني تدوينة تحمل ذكريات و ضحك و مواقف
حلوة مثل هذي.
